Baš sem kak i kakav bogec
 Bez penezov, kore kruha,
 Baš sem ti ja kakti bogec
 Bez škrlaka, starog ruha.
  
 Nisam baš i neki bogec
 Kad vu sebi duše imam,
 Baš i nisem bogcu nalik
 Kad vse dajem, niš ne zimam.
  
 Bogec jesem, bogec nisem, 
 Ista vrag kak dan i kmica,
 Bogec nisem, bogec jesem
 Isto kak i saka tica.
  
 Čudni bogec baš sem neki,
 Tinki, vitki, baš kak struna,
 Kralj vsih bogcov štel bi biti
 Al na glavi fali kruna.
  
 Baš sem ti ja pravi bogec,
 Nikaj nemam, samo senje,
 Al ti nisem bogec onda
 Kad me grle ruke nejne. 


Stihovi mraclinskog pjesnika Dražena Kosa. Pjesmu “Bogec” izveo je Pero Rogan 1994. godine na Festivalu kajkavskih popevki u Krapini.