Jednoga dana su Jankičevi tata i mama rekli da idu spravlat seno na Ščitarjevo. Je, negda su Mraclinci i tam imeli senokoše. I Jankič bi rada išel z nimi. Ali, to ne tak blizu. I tam se ide na tri dana. Barem. Dok se trava pokosi, zesuši, pozubla, skupča seno, voz složi. A kak to Jankiču reči? Več su seli na kola, i da budu pošli, kad tata veli Jankiču: – Jankič, pa kak ti je to rubača zamazana, nemreš takov iti. Ojdi na na hižu i obleči si čistu.

Jankič je brzo pošel po čistu rubaču, al je tatek bil još brži. Z bičom je ošinul kojne i kola su pojurila. Dok se spuščal z čardaka, Jankič je videl da su ga njegovi prevarili. Nu, ne se on dal samo tak. Zletel je van z dvorišča, videl de su kola pri cirkve skrenula prema štreke i pojuril za koli. I videl je da su prešli štreku i pošli prema bele ceste. To vam je ona glavna cesta kaj ide za Zagreb, zvali su ju bela jer je takva i bila, od šudra, dok su drugi puti po selu bili puni blata, sve samo ne beli. Tam su kola skrenula prema prema Vukovine, Još je to Jankič videl. Ali vu Vukovine, cesta se deli na tri puta. I tu Jankič više ne znal kam pojti. Zebral je jen put, i išel dugo, dugo. I došel je v jedno selo, gde nikoga ne poznal. Odjemput, čuje on nejakovu muziku. Idem ja to videti, veli Jankič sam sebe. To je v jedne hiže bila svadba. Svati se vesele, tamburaši sviraju, a ima i za jesti. Nu, nemreš samo tak dojti na svadbu. Nepozvan.

Ali onda Jankič med svatima vidi svega vujca, kak za stolom pije. I prijde k njemu. – Joj Jankič, pa kaj si to ti? Pak si i ti došel na svadbu! Baš dobro, ojdi sim k nam, dej si sedni. Buš i jel. I mam vujec pozove ženu z kujne i naruči zdelu žganec za Jankiča. Bormeš, za čas donesli punu zdelu žganec. Još vruči, vse se puše. – To moraš vse pojesti, veli vujec. A stareše se mora slušati. I jel je Jankič, jel. Kulko je najviše mogel.
Bil je on pravi dečko, to vsi znamo, al je zdela bila po praf velika. I kaj bu sad? I kaj ne mogel pojesti, dok vujec ne gledel, Jankič je nametal v rubaču.
– Gleč, vujec, ja sem vse pojel!
– Joj Jankič, bormeš jesi, to si nisem mogel misliti, ali sad kad jesi, idemo tancat.
I počnu oni tancati, Vujec je držal Jankiča za ruke. A kak je on bil visoki, a Jankič mali, Jankič je moral ruke zdiči visoko v zrak. I onda mu se rubača zvlekla z gač. Sami znate kaj se dogodilo, žganci su vsi scureli na pod. Vujec se jako rasrdil: – Pak si ti mene lagal, ti si mene osramotil, beš nazaj domom.

I nema druge, Jankiču je iti domom. Kak je več kesno bilo, trebalo se požuriti. Od Vukovine prema Mraclinu ima krajši put, ali ide čez šumu. I baš sred šume počela je kmica. Puta se više ne moglo videti. Tu mu je bilo za prespati. Ali kak? Mogel bi vuk dojti. A gde se skriti? Našel se tu jeden veliki šupli rast. Jankič se popel do prela i spustil se vnuter, vu šuplinu. Tu je bil na sigurnom. Ali, kad je probal kak se bude zutra zvlekel van, videl je da to nejde. Ne mogel. Z rasta se više nemre van. Pa kaj bu tu zanavek ostal? Pa kaj bu tu i vmrl? I kaj budu njegovi tata i mama mislili gde je Jankič zginul?

I vuk je došel. Osetil je on da je Jankič tu, i kružil je on, kružil oko rasta, al do Jankiča ne mogel. I moral je otiti. A Jankič je trdo zaspal. Došlo je jutro. Došli su i dva Vukovinci. Iskali su šupli rast, trebal im je kaj bi z njega delali zdenec. I našli su baš onoga v terom se Jankič skril. I počeli piliti. Kak je rast bil veliki, a njihova pila ne bila  baš najoštrejša, to je trajalo skoro celi dan. Dok je pila išla čez sredinu rasta, Jankič ju je samo prekoračil, tak da mu ne porezala noge. I pod kraj dana, kad je konačno prepilen, rast opadne. A iz šupleg pena skoči Jankič i vikne: – A ja sem tu!

Kak su se Vukovinci splašili! Ne znamo kaj su si mislili, ali znamo da su vse ostavili, i rast, i pilu, i sekire i pobegli su kaj su najbržeše mogli i posle više nigdar nesu išli vu ti del šume. Jankič je ponovno bil vane, al je i ponovno štela noč. A više nema rasta da bi se vu njem mogel skriti.Išel je tu putom neki čovek s koli, vozil je lajte. Jankič je ze šume pošel k njemu, da ga prosi da ga poveze v Mraclin. Čovek ne baš dobro videl gdo je to. On se ne bojal vuka, imel je sekiru. Al se bojal razbojnikof. I ošinul je kojne tak jako da su pojurili kaj strela tak da je i jen lajt opal z kol. Kad je to još
zaružilo, čovek se još više splašil, potiral kojne još više i ne se usudil pogledati nazaj. Jankič je ponovo sam, a vuk bu ponovo došel. Kaj sad? Vidi da je lajt praf veliki i da bi se on mogel zavleči vnuter. Tak je i napravil. I pripre dobro vrata od lajta.

I ponovo dojde vuk. Oseti gde je Jankič, ali nemre dojti do njega, nemre mu niš. Smuče se on oko lajta. Išče. Jedino je našel jedno prelo, rupu kud se vino toči v lajt. Al on tud nemre prejti. Jedino je mogel tud pretirati svoj rep. To je i napravil. Kad je Jankič rep videl, zgrabil ga je i više ne puščal. Vuka je to pak tak splašilo, počel je tak jako vleči i vleči, vse prema Dubrave, tam za Mraclinom, gde su rasti najvekši i gde je šuma najkmičneša. I vlekel je i vlekel. A da je Jankič pravi dečko, i to več znamo. I on je držal i držal za rep. I dok je vuk z lajtom i Jankičom juril prek štreke, lajt je lupil v šinu, obruči su popustili, dužice su se rasteple, a Jankič je, još držeči vukov rep, videl da se našel ponovo v svojem Mraclinu, da je pak doma, pustil je vuku rep da pobegne v Dubravu. Jankič je pak došel domom gde su njegovi bili vsi sretni kaj je on živ i zdrav i opče ga nesu puno špotali.

Spripovedal Lovro Križanić;
Čul i zapametil Mijo Kundić; 
Na paper del 28. veljače leta Gospodnjega 2023. Stjepan Čunčić