Več od Dušekov se mogel osetiti miris kokošje juve. Obluki na Barberovom čardaku v Zvonarske vulice bili su širom otprti i dok sam se vozila na beciklinu, videla sam baku kak hodi oko šporeta. Čera je zaklala kokoš tera više ni nesla i sirota je završila v loncu. Pod starim orejom v ladu su bili stol i stolci. Obični stolci, drveni z naslonom i stol teri je po sredine imel zlaček.

Baka je delala obed i za Goričane. Čekalo se da se skupimo. Deda se motal po dvorišću. Odjemput veli; ojdi mekni beciklin z ograde, bum otprl putnena vrata da moru z autom nutra. Moj lepi plavi poni. To mi je bil prvi i jedini beciklin za mojeg mraclinskog živlejna. Mene se činilo da je Gorica jako daleko i te pripreme za zajednički obed su bile vrh mojeg dečjeg doživljaja dočeka takve preštimane gostov.

Baka je na cedilo precejala juvu, žutu, masnu, a na stolu su v zdele bili rezanci tere je omesila pred teri dan. V zdele su se namakali mlinci. Rubec je imala zavezan otraga tak da je se lice lepo videlo. Vane je sunce peklo, a ona se pekla na šporetu na drva. Znoj joj se cedil a ona ga je saki čas brisala z rupčekom. Sejeno je imala čarape na nogama. I cela v crnine. Po istine, nigdar ju nis videla v druge boje. Imala je jednu tamnoplavu opravu, skoro crnu, z belemi točkicami. Mislim da ni dobro videla kad je kupovala, moguće da je v dućanu bilo slabo svetlo. Na šporetu je na komadu črepa bil lonec z šipkovim čajom. Črep je imal ulogu držati toplinu, a da čaj ne spari i da se lonec ne prikuzma. Ak se sečate onih kutijica z limunskom kiselinom, onda se sečate i male crvene žličice nutra. Taj je čaj bil najbolši teri sam ja pila.

Al vrnimo se juve. Bila je žuta ko cekin, kak bi rekla baka, a mali oblačići kokošje masti su plivali na površine. Z rola je dišala pečena guska. Baka bi tu i tam otprla rol, šefljom zagrabila mast i polevala gusku. Ja sam si mislila, to je sigurno ona teru je baka držala za vrat i nemilosrdno šopala. Nis znala jel to gusku boli ili joj paše to prejedanje. Baka je zvadila beli stolnjak od domačeg platna i rekla; odi ga presteri pa buš tajnere posložila. Inače su baka i deda jeli z plejnatih, al za taj put je zvadila bele, keramičke, kaj su po sebi imali ko špice. Bili su fajn debeli i fajn teški. Kad sam se vrnula v kujnu, veli baka; odnesi tu plejnu i hiti vodu od posudja pod murvu. Murva je bila na drugom kraju dvorišča. Velika krošnja je bila puna plodov. Jela sam ja to, ali ni mi baš bilo neke. Imali su oni rušku citronku, tik uz plot prema ceste. Navek je bilo dece kojima su te ruške bile fine. Grane su visile do ceste i saki si je mogel zeti. Meni nisu valale baš ni malo. Po istine, obavila sam ja sve kaj baka rekla, al sam vrat rastezala jel se budu skoro svi pristavili, jer sam bila gladna.

Kad su napokon došli, ja nis mogla jesti. Meni su oni dišali na grad i neki drugi svet. E da sam onda znala da bum i ja otišla v taj grad, mot bi se i najela. Ovak sam od svega više zapametila mirise i motanje po kujne, nek sami okus juve i guske. Sad si mislim, to je moral biti nekakof svetek ili god, kak bi baka rekla, jer takvo okuplanje ni bilo za običnu nedelu. Mot Vidovo ili Velika meša kad je bilo tak vruče. Nemrem se setiti, al ni niti važno. Ostal je miris kokošje juve i samo potvrdil poslovicu – stara koka, masna juva. Posle su poslovicu proširili i na mlado meso, al to ni bitno za ovo sečanje.

Post Juva, guska i mlinci je prvi puta viđen na MRACLIN.HR.