Čera su mi došli nuci Filip i Lovro i naravno, žaliju se na vrućinu. Kad sem im napravila mrzlu limunadu povedala sem:
– „Je, u pravu ste, fest je vruće, ali tak je to početkom leta. Zamislite samo da po te vrućine trebate iti v pole žeti žito, a onda ga voziti na geplanje. “
– „A kaj je geplanje? “ – pita mlajši Lovro.
– „Evo, pak sem povedala nekaj kaj vi mladi ne razmete. Oćete da vam spripovedam?“
– „Ne, baka, nemamo vremena! Imamo dogovor s dečkima u Gorici da idemo na bazen. Radije ti to napiši za portal mraclin.hr pa budemo pročitali. Bok! “
– „Bok dečki moji!“

Onda bum pisala! Ali pak bum počela od vremena turopolskih plementaških zadruga kad je o semu brinul i odlučival domaćin zadruge – pa tak i o žetve.

V Turopolu su se najviše sejali šenica, ječem, raž i zob. Se poslove v polu ljudi su ravnali prema cirkvenim blagdanima. Prvi je dozrel ozimi ječem teri se žel oko 15. lipnja, blagdana sv. Vida. Onda je došla na red šenica tera se žela oko blagdana Pohoda Marijina 2. srpnja. Malo pred Petrovo, oko 29. lipnja, dozreva jari (proljetni) ječem, a onda zob i raž. Se je trebalo biti gotovo i požeto do blagdana sv. Jane 26. srpnja.

Baš na te određene blagdane, rano jutro, gospodar zadruge išel je v pole da vidi je li žito zrelo. Otrgnul bi nekuliko vlati žita, zgulil ga na dlanu i otpuval plevu. Nekuliko zrna žita del bi u usta i probal je li zrno dosta trdo. Ako je dosta trdo, čim je došel domom počel je klepati kose i srpe i to je za sve v hiže bil znak da se drugi dan pe žeti.

V žetvu se išlo rano vjutro, nekad i prije nek je sunce zišlo, dok još ni bilo tak vruće. Žene su žele srpima, a muški kosili kosami, onda su slagali i vezali snope.

Malo posle v pole je došel domaćin i donesel težakima fruštuk– žgance z tropom, rakiju i vodu. Posle fruštukanastavili su z poslom. Kad su čuli da zvoni poldan na cirkve znali su da bu za čas došla gazdarica i tera mlada sneja i da buju v košare na glave donesle obed. Domaćin je sad donesel i lagvu vina za okrepu težakima. Kad je prešel obed stareji su si malo u hladu počinuli, a mladi su popevali, pa i zatancali.

Želo se dok sunce ni zašlo, a onda su snope slagali na kola i velike vozove žita vozili domom. Negda se vozilo na dvorišče, na gumno i tam mlatilo, a posle kad je zmišlen dreš, vozilo se na dreš i geplalo (vršilo).

Žetva sega žita trebala je biti gotova do sv. Jane, a onda, prvu nedjelu posle sv. Jane održavala se fešta kraja žetve Dolženice. Za tu prigodu v krušne peći pekli su se odojki, kruv i gibanice. Dekle i mlade sneje celu su subotu spremale i redile hižu, dvorišče i cestu ispred grunta. Na ceste je bila lepa mekana prašina pa su deca uživala bosa bežati po nje.

Saku večer pri povratku s pola žetelice su domaćici donesle nekuliko klasi žita z teroga je ona na kraju žetve napravila venec.

Na dan Dolženice si su išli na večernicu, mešu zahvalnicu za dobru žetvu. Domaćica je nosila v cirkvu venec i dela ga na oltar, a domaćin je nosil hleb kruva od nove šenice i lagvu vina. Posle večernice pak se popevalo i tancalo.

Prema tim starinskim običajima naš koreograf Vlado Cvetnić-Milek napravil je krasnu koreografiju žetvenih običaja Dolženice koju naš KUD „Dučec“ Mraclin uspješno izvodi na pozornicama svojih turneja.

Kad sem ja bila mala toga običaja više ni bilo, ali žetve i vršenja žita je. Domaćinstva su bila mejna, s mejne zemle pa je i težakof bilo mejne. V naše obitelji žele su uglavnom moja mama, baka i teta. Kad su bile gotove tetec Lacko i bratić Dragec – Franek nametali su snope na kola i taj voz žita vozili na geplajneili vršenje žita na drešu. U to vreme v Mraclinu su bila tri dreša: kod Galekovića – Gosponovih, kod Križanića – Fajnsekovih i kod Smolkovića.

Pred sakim drešom stajal je dugački red kola punih vozova žita pak smo z našim vozom na red znali dojti tek kesno navečer. Nama deci je to bilo baš lepo! Slobodno smo ostali vane do kesno i oko vozova se igrali najdraže igre – skrivača.

Voz teri je došel na red za vršidbu žita privezli bi blizu dreša tak da jen težak more dodavati snope čoveku teri je stajal na drešu. Taj čovek je snope žita metal vu veliku rupu dreša s klasjem prema dole. Na jenu je stranu padala slama, na drugoj su bile zvezane vreće v tere je padalo žito, a na treću je padala pleva.

Geplajne se plaćalo v nature ovisno o količini ovršenog žita. Vlasnik dreša uzimal je vujem(određenu količinu žita).

Domom smo vozili pune vreće žita i voz slame. Slama se spravlala v paritek(poseban prostor blizu štale) jer se slamom štrajilo kravama. Delala im se štraja – stelja. Žito se spremalo na najže (tavan) da se presuši, a onda se spremalo u velike škrijne napravlene baš za žito jer je na najže dolazila kukuriza.

Danes se poslove oko žetve i vršidbe delaju kombajni. Oni su zaprav modernizirani dreševi teri na svojim velikim kotačima idu v pole i mam žajnu i vrše žito tero se puni v prikolice traktora. Slama se automatski balira v polu, a kombajni su se vekši i jakši pa žetvu i vršidbu za celo selo obave za nekuliko dan.

KUD „Dučec“ Mraclin, Božica Krznarić

Literatura i fotografije: „Od oranja do kruha“ Igor Maroević u izlaganju Muzeja Turopolja