Prijava

Vaša prijava

  • Rubrika
  • Lovec v kôlne vode

Da se ne hiti

Da se ne hiti

Normalni ludi veliju da jê politika kaljuža, a mi bi rêkli da jê politika gnǒjčina. Smrdi, možeš grêsti i têško sê zvléči z toga gliba, a opet nekomu jê tak lépo i toplo nutre. Nekoji ideju još i glibšê i za položaj postaneju prôvi rektalni speleologi. Drugi opet vuz politiku vêžeju sam jênu réč: smetljê. Smetljê - to jê zapraf dobra definicija. Kaj jê smetljê? Ono kaj ti ostanê posle nečega, ono kaj sê višê nêmrê skoristiti. Ostôtki. Zbrčki. Falinga.

Zbrčkê jê volel ili još voli prêcednik Milanović. On jê išel v taj "Klub" na zbrčkê. Ostôtkê. Ono kaj jê ostalo, on jê išel pokupiti da ne prêpadnê. Vu ovo vrémê koronê, dok smu si bili zaprti doma, oni su imali "Klub" za pijaču i jedaču. Politička i tajkunska elita. Smetljê. Jeli su ostôtke. Negdo veli da jê politka kurva, a drugi veliju da su i najstarešê obrtnicê bilê v tém "Klubu". Gnǒjčina sam takva. I mužikôšê su imali. Nêznam kaj su popevali, ali mogli su ovak nekak...

Puknulo jê ober cirkvê Svêtog Marka,
Čoveki v žutem vulicu su prôli,
Domǒm su sê vlékli parovi z Kluba,
Kaj su mogli oni, sê su nam pokrali,
Dobro jutro!

Strêsli su ze sêbê koku i prašinu,
Stružu z pantalona ostôtke od janjetinê...

I tak dalê. A morti jê Milanović zažêlel i onu da bu ostal sloboden...

One očeju da mê vêžu,
sakoga dôna sê su jačê,
obruč oko mênê stêžu,
pohotljivê narikačê.

Ostavlam Milanovića da mirno spijê i sejna ostôtkê...

Cépleni

Počeli su cepiti protif koronê. Nôjprije bi sê trebali cepiti oni kaj su nôjvišê ugroženi. Jê, ampak to bi morti i bilo tak da néma ove kaj su z gnǒjčinê vušli i kaj su krenuli na lov na ostôtkê i cépiju sê prék rêda. Boras sê tak slučajno našel pri zubôru, tam su sê cepili protif koronê i baš su slučajno ostalê nekakve zbrčkê pak su sê on i žêna mu cepili.

Pital sem svoju zubaricu jêl mê morê na popis za cépiti vrči, a unda mi jê sva živčana skoro zuba bez anestezije spuknula. "Do jê videl da sê protif koronê pri zubôru cépi", vikala jê ona i skoro mê jê z klompum pogodila čém sem počel po košu za smetljê iskati morti jê nekakva doza ostala. Jô nésem imal srêčê kak i Boras. Nêsem našel nikakvê zbrčkê protif koronê, a još sem zubôrku tak rasrdil da mê jê naručila tek za leto dôn.

Zôkaj sê tak nôglo lêžeju?

Né mi to prijê opalo na pamet, ampak su mi ovi ostôtki dôli za misliti i sad mi jê sê bistro kak bistra gnǒjčina. Znôtê zôkaj jê tak puno ludi zaposleno v grackom poglavôrstvu i grackemi firmami? Radi velikê brigê za ostôtkê.

Kaj sê dogodi? Idê tak negdo po kancelarijami i glê, nôjdê prôzen stolec na kojemu nigdo ne sedi. Višek, ostôtek, zbrčka od stolca. I da nêbi stolec prepal, tréba nekaj napraviti. To jê društvena imovina, a de buš društvenu imovinu sam tak hitil?! I kaj sê unda napravi? Zaposli sê nǒvi čovek ili žêna da sêdnê na taj stolec. Da ne prêpadnê.

Ali pripovesti tu né kraj. Taj stolec né baš bǒgznô kakov, sigurno sê zdošel i voli nažulati onoga têri na njêmu sedi. Ne šika sê sad da nǒvi rôdnik odê na betêžnê dônê radi stolca têri ga žula?! "Halo kum, kak brat? Déla zidariju? Pôk jêsi mu rêkel da sê od poštênoga posla nigdôr nigdo né pomogel? Rêci ti mênê jêl ti još prodôvaš onê stolcê? Jê, onê erotomskê. Pošeli nam jenoga, sam pazi da ne košta višê od 200 jezerači. Znôš da nas ne prcaju z javnum nabavum." I tak dǒjdê nǒvi stolec za nǒvoga rôdnika, a stôri stolec porineju nekam v strônu.

I kaj sê dogodi? Idê tak negdo po kancelarijami i glê, nǒjdê prôzen stolec na kojemu nigdo ne sedi. Višek, ostôtek, zbrčka od stolca. I da nêbi stolec prepal, tréba nekaj napraviti. To jê društvena imovina, a de buš društvenu imovinu sam tak hitil?! I kaj sê unda napravi? Zaposli sê nǒvi čovek ili žêna da sêdnê na taj stolec. Da ne prêpadnê.

Kak ide dalê i sômi znôtê. Stolec po stolec i vêč jê fajn gužva v poglavarstvu. Morti buju i nǒvu zgradu trebali delati. A morti neki kum ima i kakvu ižu za prodati pôk sê buju preselili?!

Samo da sê ne hite zbrčkê.


Simulôtorski kajkavski

Dotepênka